Mar 23 2020

ગુજરાતી સાહિત્ય સરિતા, હ્યુસ્ટનની પ્રથમ વોટ્સ-એપ બેઠકઃ અહેવાલઃ દેવિકા ધ્રુવઃ

Published by at 1:07 pm under બેઠકનો અહેવાલ

ગુજરાતી સાહિત્ય સરિતા,હ્યુસ્ટનની પ્રથમ વોટ્સ-એપ બેઠકઃ
અહેવાલઃ દેવિકા ધ્રુવઃ

                                                       

કવિ શ્રી સુંદરમના જન્મ દિવસે, તા.૨૨ મી માર્ચના રોજ, ૨૦ વર્ષ જૂની ગુજરાતી સાહિત્ય સરિતા,હ્યુસ્ટનની પહેલી ‘વોટ્સ-એપ’ બેઠક યોજાઈ. કોરોના વાયરસને કારણે, ૨૦૫ બેઠકો પછીની આ વિશેષ બેઠક થકી સંસ્થાના ઈતિહાસમાં આ એક નવું પાનું ઉમેરાયું કે જેને લીધે હ્યુસ્ટન બહારના સભ્યો પણ ભાગ લઈ શક્યા.
નિર્ધારિત દિવસે સવારથી એક પછી એક સભ્યો પોતપોતાની ગમતી કે સ્વરચનાઓ વોટ્સ-એપ પર મૂકતા ગયાં. આમ તો નારી શક્તિનો વિષય હતો છતાં પ્રવર્તમાન સંજોગોને કારણે પસંદગી મુક્ત હતી.

 સૌથી પ્રથમ પ્રમુખ શ્રીમતી શૈલાબહેન મુન્શાએ  સૌનું સ્વાગત કરી “નારીના હર રૂપ અનોખા, હર ગુણ અનોખા” દર્શાવતી એક સુંદર સ્વરચનાને  લેખિત કરી. તે વાંચી લીધા બાદ દેવિકાબહેન ધ્રુવે કવિ શ્રી સુંદરમની પંક્તિથી શરૂઆત કરીને પછી સ્વરચિત ગઝલોના કેટલાંક શેરોની લેખિત રજૂઆત કરી કેઃ
“ એ કહે છે કંઈ ને કરે છે કંઈ, દિલ-દિમાગને ક્યાં બને છે કંઈ?
બિંદુની વાતમાં સિંધુની વાત છે,શબ્દ ને મૌન વચ્ચે ફરે છે કંઈ.
શ્રી રસેશભાઈ દલાલે સાંપ્રત કપરા સમયને અનુલક્ષીને “મનમાં આશાનું કિરણ જગાવે છે કોઈ, એ ‘કોઈ’ જ છે મારો ઈશ્વર ‘ની એક  ફોરવર્ડ અનામી રચના ફોટા સ્વરૂપે પોસ્ટ કરી. ઑસ્ટીનસ્થિત સરયૂબહેન પરીખે આધ્યાત્મિક ભાવસભર ‘એક વાર અજવાળું’ની સ્વલિખિત કવિતા રજૂ કરી.

 એક પછી એક સાહિત્યના રસિયા ઉમેરાતા ગયા. ભારત ફરવા ગયેલ સભ્ય શ્રી સતીશ પરીખે પણ ત્યાંથી  એક અનામી ગમતી રચનાનો ગુલાલ કર્યો કે “ચાલો, જે પળો છે…હસીને જીવી લઈએ.” તરત જ શ્રી રાજીવ ભાવસારે “આજ આખું વિશ્વ જો પોતાના ઘરમાં કેદ છે, ઝુમ કર જાતને,ઈશ્વર તારામાં જ નજરકેદ છે” ની વાત વહેતી મૂકી. શ્રીમતી ભાવનાબહેન દેસાઈએ  કોરોનાની કારમી સ્થિતિમાં “ઊંડા અંધારેથી પ્રભુ પરમ તેજે તું લઈ જા”ની પ્રાર્થના સુમધુર સ્વરમાં ગાઈ સંભળાવી અને સરસ્વતી સ્તુતિ પણ સંભળાવી.

શ્રી જનાર્દન શાસ્ત્રી,ચારુબહેન વ્યાસે “નારી તું નારાયણી” વિષય ની કૃતિ રજૂ કરી, ડો.ઈન્દુબહેન શાહે  તે વિશે થોડા હાઈકુ મૂક્યાં તો શ્રીમતી અવનીબહેને નારી એટલે પરિવારની શક્તિ વિષે રજૂઆત કરી. પ્રશાંત મુન્શાએ અને પ્રવીણાબહેન કડકિયાએ પણ પોતાનો હકારાત્મક સૂર પૂરાવ્યો. શ્રી ફતેહ અલીભાઈ ચતુરે કવિ શ્રી ઝવેરચન્દ મેઘાણીની ચારણકન્યાની કવિતા ‘ સાવજ ગરજે! વનરાવનનો રાજા ગરજે…ની સુંદર ઓડિયો ક્લીપ રજૂ કરી..શ્રી વિજયભાઈ શાહે દોસ્તોને સમર્પિત એક નાનકડી દ્ર્શ્ય અને શ્રાવ્ય ક્લીપ પોસ્ટ કરી. શ્રી અક્બર અલીભાઈએ સત્ય ઘટના પર આધારિત ‘હેન્ડ સેનેટાઈઝર’ની એક ઘટનાનું પોસ્ટીંગ કર્યું. શ્રી નિખિલભાઈ મહેતાએ ડો.મહેશ રાવલની એક ગઝલ વહેતી મૂકી કે,
“સુખની હારે સુખના કારણને પણ માણી લેવાના.
એ બહાને તમને ખુદ, અંદરખાને માપી લેવાના!”

દિવસને અંતે આ એક નવીન પ્રયોગરૂપ બેઠકની સમાપ્તિ જાહેર કરતા, શ્રીમતી શૈલાબહેને સૌ સભ્યોનો આભાર માન્યો. આજની બેઠકમાં પ્રમાણમાં વિષય વૈવિધ્ય હતું, સમયની મોકળાશ હતી. હ્યુસ્ટન બહારના સભ્યો પણ ભાગ લઈ શક્યા. સામાન્ય રીતે વ્યસ્તતાને કારણે બેઠકમાં ન આવતા સભ્યો પરોક્ષ હાજરી આપી શક્યા તો કેટલાંક વોટ્સ-એપ ન વાપરતા સભ્યો આમં ભાગ ન લઈ શક્યા. તે સિવાયના કેટલાક સભ્યોનું મૌન,વાચક તરીકે નોંધાઈ પ્રશંસનીય રહ્યું. ટેક્નોલોજીની બલિહારીને કારણે ૫૪ જેટલા સભ્યો આ બેઠકને વાંચી રહ્યા હતા તે વાંચી શકાયું!!  આ સાથે હ્યુસ્ટનના ‘મસાલા રેડિયો’ પર આ બેઠકની માહિતીનું પ્રસારણ કરવા માટે શ્રીમતી ઈનાબહેન પટેલનો આભાર.

 આમ જોઈએ તો વોટ્સ-એપ પર રોજ ફરતા રહેતા લખાણોની કોઈ નવીનતા નથી. પણ એક ચોક્કસ રીતે, નક્કી કરેલા વિષય પર, નિયમો મુજબના સાહિત્યિક લખાણો વ્યવસ્થિત રીતે રજૂ થાય એ એક આવકારદાયક રીત છે.

ગુજરાતી સાહિત્ય સરિતાના ઈતિહાસની પ્રવૃત્તિઓમાં આ નવીન પ્રયોગની નોંધ લેવાશે. અંતે, કોપી/પેસ્ટ તથા ફોરવર્ડમાં વ્યસ્ત લોકોના સાહિત્યિક સ્તરને વધુ આગળ લઈ જતી વોટસ-એપ વર્કશોપની અને વધુ દૄશ્ય અને શ્રાવ્ય પ્રયોગોની આશા રાખીએ.

અસ્તુ.

દેવિકા રાહુલ ધ્રુવ.
માર્ચ ૨૩,૨૦૨૦

 

9 responses so far

9 Responses to “ગુજરાતી સાહિત્ય સરિતા, હ્યુસ્ટનની પ્રથમ વોટ્સ-એપ બેઠકઃ અહેવાલઃ દેવિકા ધ્રુવઃ”

  1. શૈલા મુન્શાon 23 Mar 2020 at 3:15 pm

    કોરોના વાઈરસના ભયને લીધે માર્ચ મહિનાની બેઠક થશે નહિ એ દુઃખમાં એક આશાનુ કિરણ દેખાયું. સાહિત્ય સરિતાના વોટ્સેપ ગ્રુપને જો બેઠકમાં ફેરવી દઈએ તો!!
    મારા આ વિચારને સમિતીએ આવકાર્યો અને નિર્ધારિત તારીખે વોટ્સેપ બેઠક યોજાઈ. ઘણા સભ્યોએ ઉત્સાહપૂર્વક ભાગ લીધો, અને આ બેઠકનો મોટો ફાયદો એ થયો કે હ્યુસ્ટન બહારથી પણ સભ્યો એમાં ભાગ લઈ શક્યા.
    દરેક બેઠક પછી લખાતા અહેવાલની જેમ જ દેવિકાબહેને ખૂબજ વિગતવાર અને રસમય અહેવાલ લખ્યો.જાણે એમ જ લાગ્યું કે ખરેખર આપણી બેઠક યોજાઈ.
    સહુના સાથ બદલ ફરી દિલથી આભાર.

  2. Indu Shahon 23 Mar 2020 at 4:01 pm

    આ પ્રયોગ સફળ થયો .કમિટીને અભિનંદન
    વિગતવાર ઝડપી અહેવાલ દેવિકાબેન જ મૂકી શકે.સરસ ,નવા પ્રયોગ કરતા રહો એ જ શુભેચ્છા👏👏

  3. Ranna Parghion 23 Mar 2020 at 5:13 pm

    સાહિત્ય સરિતાને પ્રથમ પ્રયોગ ની સફળતા માટે ખુબ અભિનંદન. અહેવાલ વાંચીને આનંદ થયો કમિટીને ધન્યવાદ

  4. જનાર્દન શાસ્ત્રીon 23 Mar 2020 at 5:17 pm

    ખુબ જ સુંદર સફળ પ્રયાસ, કમિટીને અભિનંદન.
    વિગતવાર ઝડપી સરસ અહેવાલ બદલ દેવિકાબેનને ધન્યવાદ
    🙏🙏🙏

  5. Nayana Shahon 23 Mar 2020 at 10:11 pm

    👌👌👌👌👏👏👏👍🙏

  6. સતિષભાઈ પરીખon 24 Mar 2020 at 4:02 am

    રિપોર્ટ અતિ સુંદર છે. પ્રથમ તો અમારી કમિટી ના ઉત્સાહી અને બાહોશ પ્રમુખ શૈલાબેન મુન્શા ને અભિનંદન આવા સરસ વિચાર માટૅ અભિનંદન આપવા ઘટે. સાથે સાથે સાહિત્ય સરિતા નું હર હંમેશ ગૌરવ વધારનારા અમારી કમિટી ના સલાહકાર કે જેમણે આટલી ઝડપથી અને અદભૂત રિપોર્ટ તૈયાર કર્યો તે બદલ ખુબ ખુબ અભિનંદન.
    હવે બીજી એક આડ વાત????????
    હવે હું stpbull રહ્યો નથી એટલે stpdead અથવા તો stpnowhere કરવાની તાતી જરૂર laageche.
    કરોના વાઇરસ ની લપડાક જિંદગી ભર યાદ રહી jashe.
    શુભેચ્છાઓ સહિત

  7. Navin bankerson 24 Mar 2020 at 10:58 am

    Very nice.

  8. Bhavana Desaion 24 Mar 2020 at 5:37 pm

    શૈલાબહેન, દેવિકાબહેન અને દરેક કમિટીના સભ્યોએ સંજોગોથી હાર ન સ્વિકારતાં સફળતાપૂર્વક બેઠકનું સંચાલન કર્યું તે બદલ અભિનંદન. એક ઐતિહાસીક બનાવ બન્યો. આટલો ત્વરિત અહેવાલ પણ નોંધવા લાયક કહેવાય. જે લોકોએ પ્રસ્તુતિ કરી તે પણ બધી જ સુંદર હતી. એવું લાગે છે કે કોરોનાએ સાહિત્ય સરિતાને વેગ આપ્યો છે. સૌને ધન્યવાદ.

  9. શૈલા મુન્શાon 25 Mar 2020 at 10:24 am

    આપ સહુને ધન્યવાદ, નવા પ્રયોગને આવકારવા બદલ. આ એક ટીમ વર્ક છે અને સહુએ એમા સાથ અને સહયોગ આપ્યા.
    વધુને વધુ લોકો આપણી વેબસાઈટ પર જઈ પ્રતિભાવ આપી રહ્યા છે એ પણ આનંદની વાત છે. વધુ પ્રતિભાવથી અહેવાલ લખનારને પણ આંતરિક સંતોષ મળે છે.
    ફરી દિલથી ધન્યવાદ.

Comments RSS

Leave a Reply

Type in
Details available only for Indian languages
Settings Settings reset
Help
Indian language typing help
View Detailed Help