Apr 30 2019

ગુજરાતી સાહિત્ય સરિતા, હ્યુસ્ટનની બેઠક નં.૧૯૬નો અહેવાલ-શ્રીમતી ચારુબહેન વ્યાસ

Published by at 11:45 am under બેઠકનો અહેવાલ

 

તસ્વીર સૌજન્યઃ શ્રી જયંત પટેલ..

 

ગુજરાતી સાહિત્ય સરિતા,હ્યુસ્ટનની બેઠક નં ૧૯૬, તારીખ ૨૭મી એપ્રિલ ૨૦૧૯ના રોજ આયોજિત કરવામાં આવી હતી.મેટલેજ રોડ પર આવેલા સુગરલેન્ડ કોમ્યુનીટી સેન્ટરનાં હોલમાં બરોબર બપોરનાં 3.30 વાગ્યે બેઠકનો આરંભ થયો. 

આ વખતની બેઠકમાં ગુજરાતી ગીત-સંગીતનો કાર્યક્રમ રાખવામાં આવ્યો હતો,જેમાં પ્રણયગીતો, લોકગીત,ભક્તિગીત,દોહા તેમ જ ગુજરાતી ગઝલનો સમાવેશ થયો હતો. ઘણાં સભ્યોએ ઉત્સાહપૂર્વક ભાગ લીધો હતો.ઘણાં નવા સભ્યો બન્યા અને મહેમાન શ્રોતાઓ પણ આવ્યા હતાં. આખું વાતાવરણ ઉત્સાહ અને આનંદથી છલકાઈ ગયું હતું. ચહા અને બિસ્કિટ થી બધાનું સ્વાગત કરવામાં આવ્યું  હતું. સભાની શરૂઆત પ્રાર્થનાથી થઈ. શ્રી નિખિલભાઈએ સુન્દર અને ભાવવાહી સ્વરે ‘યા કુન્દેન્દુ તુષારહાર ધવલા…સરસ્વતી વંદના ગાઈ  હતી. ત્યાર બાદ પ્રમુખ શ્રી ફતેહ અલીભાઈએ ઘણી સંખ્યામાં ઉપસ્થિત સભ્યો અને મહેમાનોને આવકાર્યા હતા. તેમણે ગીત,સંગીતની શરૂઆત કેવી રીતે થઈ હતી તેની માહિતી આપી હતી.

સભાનું સંચાલન શ્રી નીખિલ મહેતાને સોંપવામાં આવ્યું હતું. તેમણે શ્રી નરસિંહરાવ દિવેટિયાની રચના “પ્રેમળ જ્યોતિ તુજ દાખવી મુજ જીવન પંથ ઉજાળ’ ગાઈને શરૂઆત કરી. એની પૂર્વભૂમિકા બાંધતાં તેમણે કહ્યું કે જોન હેન્રી ના ‘ pillar of the cloud’ થી પ્રેરાઈને આ ગીતની રચના નરસિંહરાવે કરી હતી. પોતાની વાત આગળ ચલાવતાં શ્રી નિખિલભાઈએ નરસિંહ મહેતાનું એક  પદ જાગીને જોઉં તો જગત દીસે નહીં ગાયું જેમાં વેદ અને ઉપનિષદનો ગૂઢ અર્થ સમાયેલો છે. ભક્તિથી ભરપૂર આસ્વાદમાં બધા  ભક્તિરસમાં  ડૂબી ગયા હતાં.

શ્રી નિખિલભાઈએ શ્રી મનોજભાઈનો પરિચય આપતા કહ્યું કે તેઓ ગીત લખે છે, સ્વરબદ્ધ કરે છે અને પોતે ગાયક પણ છે કહી તેમના ગ્રુપને આવકાર્યા હતાં. સ્મિતાબેન વસાવડા જે ખૂબ સારા ગાયિકા છે તેમણે અવિનાશ વ્યાસની અમર કૃતિ ‘મારા રામ તમે સીતાજીની તોલે ન આવો ‘  અને બીજું ગીત ‘છેલાજી રે’ ગાયું હતું. તેમનો સુમધુર અવાજ અને ગાયકી સૌને ડોલાવી ગઈ. પ્રથમ ગીતમાં રામ સામે ફરિયાદ હતી તો બીજા ગીતમાં પ્રિયતમ પાસે પટોળાની માંગ! સ્મિતાબેને ખૂબ જ સુંદર માહોલ ઉભો કર્યો હતો. ત્યાર બાદ ઉદયનભાઈ શાહે કાંતિ અશોકની રચના સાજન મારી પ્રીતડી‘  એક પ્રેમ ગીત અને રાસબિહારી ભાઈની રચનાઆજ મેં તો સાંભળ્યો મોરગાઈને બધાને રાત્રીની સુંદરતાની કલ્પનામાં ડૂબાડી દીધા હતાં.

 ગીતો અને કાવ્યોનો  કાફલો આગળ વધ્યો. પ્રેક્ષકો આતુરતાપૂર્વક બીજા ગાયકની રાહ જોતા હતાં. મનોજભાઈ મહેતાએ અનિલ જોશીની રચના  મારી કોઈ ડાળખી માં પાંદડા નથી’ અને બીજી તેમની સ્વરચના કેવું જીવન છે ગમે  કે ન ગમે સહેવાનું જીવનની ફિલસૂફીભર્યું રજૂ કર્યું. તેમની રજૂઆત કાબિલેદાદ હતી. કલ્પનાબેન મહેતાએ, મુકેશ જોષી લિખિત પ્રેમગીત કૈક ચોમાસા ને વરસાદ રાધા’ અને બીજું ગીત હરેન્દ્ર  દવે રચિત ‘પાન લીલું જોયું ને તમે યાદ આવ્યાં’ ગાઈ સંભળાવ્યું. તે પછી કવિ શ્રી દયારામની કૃતિ લઈને નાગરનાર લોપાબેન પંડિત આવ્યા. તેમણે હવે સખી નહિ બોલું ‘ ગીત દ્વારા રાધાકૃષ્ણ ના રીસામણા, મનામણાંને અદભૂત રીતે છલકાવ્યાં. તો બીજાં ગીતમાં રૂપલે મઢી છે સારી રાત સાંભળીને તો શ્રોતાજનોને મંત્રમુગ્ધ કરી દીધા. લોપાબેનની ગાયકીને સો સો સલામ. 

શ્રી પ્રકાશભાઈ મજમુદારે ‘બેફામ’ની ગઝલ ‘નયનને બંધ રાખીને..” અને કવિ શ્રી રાવજી પટેલનું ગીત મારી આંખે કંકુ ના સૂરજ ઉગ્યા રજૂ કર્યું હતું. સાંભળી ને ઘણા ની આંખો ભરાઈ આવી હતી.  શ્રીમતી ભારતીબેન મજમુદારે હંસલા હાલો રે હવે મોતીડાં ‘–રજૂ કર્યું હતું. ત્યારબાદ દેવિકાબેન ધ્રુવે ‘દ્રશ્ય અને શ્રાવ્ય’ રૂપે પ્રોજેક્ટરની સહાયથી ગુજરાત વિષયક ગઝલગીત ‘વાણી મારી ગુજરાતી ને ભૂમિ મા ગુજરાત છે’ સ્ક્રીન પર રજૂ કર્યું. આ ગીતનું સ્વરાંકન શ્રી ગૌરાંગ વ્યાસે કરેલ અને તેમાં સૂર અને સંગીત સંયોજન હ્યુસ્ટ્નના ગાયક શ્રી શેખર ફાટકે આપેલ હતો. ગીતનું ઓડીઓ-વીડિયો  વિઝયુઅલ, ખુબજ સુંદર શબ્દો અને રચનામાં ગુજરાતી ભાષા પ્રેમ દેખાઈ આવતો હતો. ખૂબ ખૂબ અભિનંદન દેવિકાબેનને.

ચારુબહેને પોતાના વડીલ સ્વ. લાભુ મોટીબા જે એમના જમાનાથી  ખૂબ આગળ હતાં તેમની જૂની રચના રજૂ કરીને તેમને નમન પાઠવ્યા હતા.સાથે તેમની ભાભી ને શ્રદ્ધાંજલી આપી હતી જેમાં  ‘ચૂંદડી લાવો કન્યા ના કોડ ઝળકતાં હતાં. ઉમાબેન નગરશેઠે સુરેશ દલાલની રચના નજરુંના કાંટા ની ભૂલ મારા વાલમા ખુબજ સુન્દર રીતે, ધીરે અને લયબદ્ધ ગાયું.  બીજાં એક નવા સભ્ય શ્રી વિજયભાઈ શાહે વેણીભાઈ પુરોહિતનું બહુ પ્રખ્યાત ગીત તારી આંખ નો અફીણી ‘ગાયું.નયનાબેન  શાહે  પંકજ ઠાકર  રચિત’ અગમ નિગમ ની દુનિયા’ ફિલોસોફીથી ભરપૂર પાલવ ગીત સાંભળતાં જ હૈયું અને મન બેઉ ભીંજાઈ ગયાં.

ત્યારબાદ બેઠકે જરા વળાંક લીધો. જાણીતા અને માનીતા નાટ્ય અભિનેતા શ્રી મુકુન્દભાઈ ગાંધીએ  ઉંચા પહાડી અવાજે, રાણકદેવી અને રાખેંગારના સંવાદોની સાથે સાથે દોહા રજૂ કર્યાં. તેમની રજૂઆત વખતે શ્રોતાઓ જાણે કે, રાણકદેવીના મહેલમાં પહોંચી ગયા તો વાદળ સાથે વાતો કરતા ગિરનાર ઉપર જાણે ચડી ગયા! ખૂબ મઝા આવી. તે પછી રક્ષાબેન પટેલે લાગણી સભર ગીત  ‘મારી વેણી માં ચાર ચાર ફૂલ ‘ ખૂબ જ ભાવ સાથે રજૂ કર્યું. બધાને ગમી ગયું. તનમનબહેને બાલમુકુંદ દવે રચિત ‘કેવાં રે મળેલા મનના મેળ ખૂબ જ ભાવવાહી સ્વરે ગાયું, સુરેશભાઈ બક્ષીએ શૂન્ય પાલનપુરીની ગઝલ નહીં હોય ચંદાનું  ઘાયલ જીગર ‘રજૂ કરી. તેમની અંદાઝે બયાં પ્રશંસનીય રહી.  શ્રી પ્રશાંતભાઈએ સરસ હાવભાવ સાથે તને જતા જોઈ મારુ મન મોહી ગયું ગાયું.  એમના ચહેરા પરના ભાવ બધાને આનંદ આપતા હતા. શ્રી વિશ્વદીપભાઈ અને તેમના પત્ની રેખાબેન બારડ મંચ પર સાથે આવ્યા. રેખાબેને આવો  તો ય સારું ન આવો તો ય સારું ગીત રજૂ કર્યું. વિશ્વદીપભાઈએ પ્રેમ અને પુષ્પનો સંબંધ વ્યક્ત કરતી બે પંક્તિ સંભળાવી.

ગીતોનો દોર પૂરો થયા પછી કેટલીક અગત્યની જાહેરાતો અને  જરૂરી વ્યવહારુ અભિવ્યક્તિ કરવામાં આવી. શ્રી દીપકભાઈ ભટ્ટે એક સુંદર કાવ્ય સંપૂટની જાહેરાત કરી. દેવિકાબહેને આગામી બેઠકમાં ભારતથી પધારનાર ‘જૂઈમેળો’ના પ્રણેતા શ્રીમતી ઉષાબેન ઉપાધ્યાય વિશે માહિતી આપી.  શ્રી વિશ્વદીપભાઈએ ૧૬ જૂનની પિકનિકની જાહેરાત કરી. પ્રસન્નવદના શ્રીમતી શૈલાબહેન મુન્શાએ બધાનો દિલથી સુંદર રીતે આભાર માન્યો. તસ્વીરકાર શ્રી જયંત પટેલ દ્વારા સૌની સામૂહિક તસ્વીર લેવામાં આવી અને છેલ્લે ‘સ્પોન્સરર’ શ્રીમતી જ્યોતિબહેન વ્યાસ અને બીજા શ્રી પ્રદીપભાઈ બ્રહ્મભટ્ટના સૌજન્યથી આજના ભોજનને ન્યાય આપી સૌ છૂટાં પડ્યાં. 

સરિતાના સહુ સભ્યોએ ઉમંગભેર પોતાનો પ્રસંગ હોય તેમ ભોજન પિરસવાથી માંડી ટેબલ, ખુરશી, યોગ્ય જગ્યાએ મૂકવા સુધી હોંશભેર સાથ આપ્યો.

એકંદરે આ બેઠક સુંદર આયોજન, નવી બેઠક વ્યવસ્થા, વિષય વૈવિધ્ય અને વધુ શ્રોતાજનોને  કારણે સફળ રહી.

કમિટીના આગેવાનો અને સહકાર્યકરોને અભિનંદન..

 અસ્તુ.

ચારુબહેન વ્યાસ

8 responses so far

8 Responses to “ગુજરાતી સાહિત્ય સરિતા, હ્યુસ્ટનની બેઠક નં.૧૯૬નો અહેવાલ-શ્રીમતી ચારુબહેન વ્યાસ”

  1. Chiman Patelon 30 Apr 2019 at 1:08 pm

    આ અહેવાલ વાંચી લાગ્યું કે હવે ચારુબેન માટે આ કામ કાયમ માટેનું થઈ જતાં નવિ કમિટિને નવા કામોની સાથે અહેવાલ લખવા માટેની ચિંંતા કરવી નહિ પડે.

    ચારુબેનને ‘ચમન’ના ખાસ અભિનંદન.

  2. શૈલા મુન્શાon 01 May 2019 at 11:14 am

    ખુબ સુંદર અહેવાલ. દેવિકાબેનની અહેવાલને વધુ રમ્ય બનાવવાની માવજત દેખાઈ આવે છે. સભ્યોના સમૂહ ફોટાને સમાવી, અહેવાલને વધુ રમ્ય બનાવ્યો છે.
    જયંતભાઈ હર હમેશ સરસ ફોટા પાડી સમયસર મોકલી આપે છે, એ બદલ ખુબ ખુબ આભાર.
    અહેવાલ વાંચી નહિ હાજર રહેલાને કશુંક ગુમાવ્યાનો ખેદ જરૂર થશે.

  3. Navin Bankeron 02 May 2019 at 11:31 am

    અહેવાલ ખુબ સરસ રીતે લખાયો છે. બધી જ વાતોને વણી લેવાઇ છે. ચારૂબેન આવી જ રીતે હરહંમેશ અહેવાલો લખતા રહે એવી અપેક્ષા.
    નવીન બેન્કર

  4. VISHWADEEP BARADon 02 May 2019 at 1:51 pm

    ચારુંબેન. સુંદર,સાહિત્યસભર હ્યુસ્ટા ગુજરાતી સાહિત્ય સરિતાની બેઠકનો અહેવાલ લખવા બદલ ધન્યવાદ,સાહિત્ય રસિક દરેક સભ્યનેઃઅહેવાલ” લખવા પ્રેરણા આપવી જોઈએ, ચારુબેન એક સુંદર ઉદાહરણ.

    (ઉપરનો પ્રતિભાવ , ફોનપરથી લખવામાં આવે ત્યારે સ્પેલની ભુલો થઈ જાય તે સ્વભાવિક છે..છતા દરગુજર)

  5. શ્રીમતી ચારૂબેન,
    જય જલારામ સહિત આપાનો ખુબ જ આભાર કે તમે મીટીંગની માહિતી મુકીં મારાથી સમયને કારણે હાજર ન રહેવાયુ કારણ મારી મેડીકલ ક્લિનીકને કારણે અવાયુ નહી.
    લી. પ્રદીપ બ્રહ્મભટ્ટ તરફથી આભાર કે તમે ભારતથી ગુજરાતને અહીં લાવ્યા છો.

  6. Indu Shahon 03 May 2019 at 4:03 pm

    ચારૂબેન,
    અહેવાલ ખૂબ સુંદર, અને વિગતવાર હવે તમે હંમેશ અહેવાલ લખતા રહો તો ગેરહાજર રહેલ વ્યક્તિ જાણે હાજર હોય તેઓ અહેસાસ જરૂર મેળવશે,
    અભિનંદન.

  7. Navin Bankeron 04 May 2019 at 4:47 pm

    હજી ગુજ્જુઓ બ્લોગ પર જઈને અહેવાલ વાંચવા ટેવાયેલા લાગતા નથી અથવા તેઓ કોમેન્ટ લખવાનું ટાળે છે. અહેવાલ બ્લોગ પર મુકાઈ ગયા પછી પણ મને ઘણાં ફોન આવ્યા કે નવીનભાઈ, હજી અહેવાલ કેમ નથી મોકલ્યો? ‘ મેં એમને સમજાવ્યું કે આપ સાહિત્ય સરિતાના બ્લોગ પર જઈને ચારુબેન વ્યાસ લિખિત અહેવાલ વાંચી શકો છો.’
    મેં આવા લોકોને અહેવાલો લખી લખીને ઇ -મેઇલથી મોકલવાની કુટેવ પાડી હતી.
    નવીન બેન્કર

  8. vimala Gohilon 07 May 2019 at 1:54 pm

    .
    બેઠકની સર્વ પ્રવૃતિને આવરી લેતો ચારૂત્તર અહેવાલ.
    જેમાં એક શિક્ષક્ની મુદ્દાસર , ક્રમવાર રજુઆત કરવાની છાંટ જોવા મળી.
    બેઠક પછી ફરી એકવાર બેઠક માણી.
    આભાર ચારુબેન.

Comments RSS

Leave a Reply

Type in
Details available only for Indian languages
Settings Settings reset
Help
Indian language typing help
View Detailed Help