બેઠક નં. ૨૬૩ઃ
અહેવાલઃ નરેન્દ્ર વેદ
સંકલનઃ રિદ્ધિ દેસાઈ
સંપાદનઃ દેવિકા ધ્રુવ

ડિસેમ્બરની ૮મી તારીખે સાંજે ૪ વાગે ગુજરાતી સાહિત્ય સરિતાની ૨૬૩મી બેઠક – વાર્ષિક બેઠક આશરે ૪૫ સભ્યોની હાજરી સાથે મળી. શરુઆતમાં ભાવનાબહેન દેસાઈએ તેમના સુંદર સ્વરે ગુજરાતીમાં સરસ્વતી વંદના કરી.

ત્યારબાદ ઉપપ્રમુખ રિદ્ધિબહેન દેસાઈએ ૨૦૨૪માં મળેલી બધી બેઠકોનું ટૂંકમાં વિહંગાવલોકન કર્યું. તેમણે બધાં સભ્યોને ગુ.સા.સ.ની વાર્ષિક ફીના વ્યાજબીપણા અને તે વધારીને $૨૫ કરવા વિષે ચર્ચા શરુ કરી. આગલા વર્ષમાં ગુ.સા.સ. ૨૫મા વર્ષમાં પ્રવેશે છે અને કોઈ ભવ્ય કાર્યક્રમની શક્યતા અને આજની મોંઘવારીને ધ્યાનમાં લઈ મોટા ભાગના સભ્યોને $૨૫ વ્યાજબી લાગ્યા. આથી ૨૦૨૫થી કુટુંબ દીઠ વાર્ષિક વધારીને $25 કરવાનો ઠરાવ બહુમતીથી  પસાર થયો.

દેવિકાબહેન ધ્રુવે ચાલુ સમિતિના ૨૦૨૪ના કાર્યને સારો આવકાર આપતાં એ પણ કહ્યું કે કાર્યની વહેંચણી વધુ કાર્યકર્તામાં થાય તો કાર્ય વધુ સરળતાથી થઈ શકે. તેમણે બધા સભ્યોને ગુ.સા.સ.ની website પર નિયમિત રીતે જઈ વાંચવા અને ત્યાં પોતાના વિચારો તથા સૂચનો લખવાનો અનુરોધ કર્યો. આપણને બધી જ ભાષાઓ આવકાર્ય હોવી જોઈએ જેથી અંગ્રેજી, હિંન્દી કે અન્ય ભાષામાં અનુવાદ પણ કરી શકાય. સમિતિએ તેમના સૂચનો આવકાર્યા અને તે તરફ બનતા પ્રયત્ન કરીશું તેમ જણાવ્યું. તે ઉપરાંત તેમણે, ટૂંક સમયમાં પ્રકાશિત થનાર  તેમના નવા કાવ્યસંગ્રહ ‘અહીં જ બધું’ નો ખૂબ સંક્ષિપ્તમાં પરીચય આપ્યો.

ત્યારબાદ ગુ.સા.સ.ના ખજાનચી નરેન્દ્રભાઈ વેદે ૨૦૨૪નો આર્થિક અહેવાલ રજૂ કર્યો અને તેની પ્રતની વહેંચણી કરી. કોઈ સભ્યોને આ બાબતમાં કોઈ પ્રશ્ન કે વાંધો ન હતો. આ અહેવાલ સર્વાનુમતે સ્વીકારાયો. ફતેહ અલિભાઈ ચતુરે ગુ.સા.સ.ની રજતજયંતિ ખૂબ ધૂમધામથી ઉજવવાનો અનુરોધ કર્યો.

અરવિંદભાઈ થેકડીએ સ્મૃતિસંપદા પુસ્તકનો જો અંગ્રેજી અનુવાદ કરીએ તો આપણી યુવાન પેઢી જે ગુજરાતી વાંચી શકતા નથી તેને અમેરિકાના શરુઆતના ભારતીય immigrantsને પડેલ અસંખ્ય મુશ્કેલીઓ અને પડકારોનો ખ્યાલ આવે અને તે પ્રેરણાદાયક બને. તેના અનુસંધાનમાં ગુ.સા.સ.ના પ્રમુખ નિખિલભાઈ મહેતાએ તે જ સવારે તેમણે આર્ષર્વિદ્યા ગુરુકુલમનાં બાળકો જે અમેરિકામાં જન્મેલ છે તેમના મોઢે પાણિનિના સંસ્કૃત વ્યાકરણના અષ્ટાધ્યાયીનીનો મુખપાઠ સાંભળ્યો. આ અનુભવથી તેમણે તારવ્યું કે જો ગુજરાતી પરિવારો ઘરમાં બાળકો સાથે ફ્ક્ત ગુજરાતીમાં જ વાતચીત કરે તો કદાચ ગુજરાતી બોલી આ દેશમાં સચવાશે.

ત્યારબાદ ૨૦૨૫ માટેની કાર્યવાહી સમિતિના સભ્યોની નિમણૂકની ચર્ચા શરુ થઈ. ગુ.સા.સ.ના ચારેક સભ્યોએ મૌખિક રીતે અને email દ્વારા ૨૦૨૪ના અધિકારોના કાર્ય, creativity અને ક્ષમતાને ધ્યાનમાં લઈ એમને જ ૨૦૨૫માં આ જવાબદારી સોંપવાનો અનુરોધ કર્યો હતો. હાજર રહેલા બધા સભ્યોએ સર્વાનુમતે નિખિલભાઈ મહેતા પ્રમુખ, રિદ્ધિ દેસાઇ ઉપપ્રમુખ અને નરેન્દ્રભાઈ વેદ સચિવ/ખજાનચી તથા હસમુખભાઈ દોશીને સલાહકાર ૨૦૨૫ના વર્ષ માટે જવાબદારી સોંપી હતી.

નિખિલભાઈ મહેતાએ જણાવ્યું કે, ૨૦૨૪ની સિદ્ધિઓમાં ઘણા બધાનો સહકાર હતો જેને લીધે જ સફળતા શક્ય બની. દેવિકાબહેન જેમણે સ્મૃતિસંપદા વખતે પોતે સક્રિય રહી, અન્ય સભ્યોને લખતા કર્યા અને ટેનેસી-સ્થિત રેખાબહેન સિંધલ સાથે રહી પુસ્તકના પ્રકાશનને જીવંતરુપ આપ્યું. તે માટે તેમનો આભાર માન્યો. તેમણે બધા દાતાઓનો ખાસ કરીને હસમુખભાઈ દોશીનો આભાર માન્યો. ઘણા બધા સ્વયંસેવકો – પ્રફુલભાઈ ગાંધી, દિનેશભાઈ પટેલ અને ફોટોગ્રાફી માટે જયંતભાઈ પટેલ, પ્રકાશભાઈ મજમુદાર, મનોજભાઈ મહેતા અને અશોકભાઈ ભાવસારનો sound system માટે તથા દર મહિને જગ્યાના નિઃશુલ્ક વપરાશ માટે City of Sugar Landનો હાર્દિક આભાર માન્યો અને ભવિષ્યમાં પણ આ જ સહકાર અને ઉદારતા ચાલુ રહે તેની આશા વ્યક્ત કરી. નરેન્દ્રભાઈ વેદે અવનીબેન મહેતાની કળાકારી, અથાગ મહેનત અને દક્ષતા માટે આભાર વ્યક્ત કર્યો. અંતે હળવો નાસ્તો અને ચાપાણી કરી સૌ છૂટા પડ્યા.

—નરેન્દ્ર વેદ

Comments RSS